ලංකාවෙ අපිට අගෝස්තු පාසල් නිවාඩුවට යන්න තැනක් තෝරගන්න එක හිතන තරම් ලේසි නෑ. මොකද අපේ රටේ යන්න තියෙන තැන්, බලන්න තියෙන තැන් ගොඩයි. ඒත් ඒ හැම තැනක්ම හැමෝටම හරියන්නෙ නෑනේ. ඉතින් ඔයාලගේ හිතේ තියෙන බජට් එකට, කැමැත්තට ගැලපෙන තැනක් තෝරගන්න එක තමයි වැදගත්. අපි අද කතා කරන්න යන්නේ අගෝස්තු නිවාඩුවට යන්න පුළුවන් හොඳම තැන් 5 ගැන. මේ පැහැදිලිකිරීම ඔයාගෙ තීරණය ගන්න පහසුවක් වෙයි.
1. මහනුවර – ඇසළ පෙරහැරේ අසිරිය විඳින්න
අගෝස්තු කිව්ව ගමන් කාටත් මතක් වෙන්නේ මහනුවර ඇසළ පෙරහැර. ලෝක පූජිත මේ උත්සවය අපේ සංස්කෘතික අනන්‍යතාව මැනවින් විදහා දක්වනවා. හැම අවුරුද්දෙම අගෝස්තු මාසයේ පැවැත්වෙන මේ උත්සවය නරඹන්න දෙස් විදෙස් සංචාරකයෝ බොහෝ පිරිසක් එනවා. මේක කුඩා දරුවන්ට අපේ රටේ සංස්කෘතිය ගැන හැඟීමක් ඇති කරවන්න පුළුවන් බොහොම හොඳ අවස්ථාවක්.
ඇයි මෙතනට යන්න ඕනේ?
- ලස්සනට සැරසුණු අලි ඇතුන්, නැටුම් කණ්ඩායම්, තූර්ය වාදකයින් සහිත ලෝකයේ ඉපැරණිම සංස්කෘතික පෙරහැරක් නැරඹීමට අවස්තාව ලැබීම.
- දළදා මාලිගාව, සතර මහා දේවාල වගේ සංස්කෘතික වශයෙන් වැදගත් ස්ථාන බලන්න පුළුවන්.
- මහනුවර රාජධානි සමයේ ඉදිකළ උද්‍යාන, වැව් බලන්න යන්නත් පුළුවන්.
- තරමක් නුදුරිල් නුවරඑළියේ සීතල කාලගුණය විඳින්නත් පුළුවන්.
අගෝස්තුවේ මහනුවර සංචාරය කරනවානම් මතක තබාගත යුතුම දෙයක් තමයි පෙරහැර කාලෙට නුවර නගරය ගොඩක් ජනාකීර්ණ වෙනව කියන එක. ඒ නිසා කලින් හෝටල් වෙන් කරවා ගැනීම සහ පෙරහැර බලන්න ආසන වෙන් කරවා ගැනීම හොඳයි. ජනාකීර්ණ වන නිසා කුඩා දරුවන්ගේ ආරක්ෂාව ගැන සැලකිලිමත් වීමත් ඉතාමත් වැදගත්
2. යාපනය – උතුරේ සුන්දරත්වය විඳින්න
උතුරු පළාතේ බොහොම වැදගත් සංචාරක ගමනාන්තයක් වන යාපනය, සංස්කෘතික වශයෙන් වගේම ඓතිහාසික වශයෙනුත් වැදගත් නගරයක්. මේක ශ්‍රී ලංකාවෙ ඉඳන්ම දකුණු ඉන්දියාවේ සංචාරයකට යනව වගේ බොහොම විශේෂ අද්දැකීමක් වෙයි.
ඇයි මෙතනට යන්න ඕනේ?
- නල්ලූර් කෝවිල, දඹකොළ පටුන වගේ ආගමික ස්ථාන බලන්න යන්න පුළුවන්.
- කාසල් බීච්, කයිට්ස් බීච් වගේ වෙරළ තීරයන් වල නිදහසේ නාන්න පුළුවන්.
- රසවත් යාපනේ කෑම වල රස බලන්න පුළුවන්.
- යාපනය කොටුව, රියෝ අයිස් ක්‍රීම් පාර්ලර් එක වගේ තැන් බලන්න යන්න පුළුවන්.
යාපනයේ සංචාරය කරනවා නම් විශේෂයෙන්ම මතක තබාගතයුතු දෙයක් තමයි යාපනයේ සමහර ප්‍රදේශවලට යන්න කලින් අවසර ගන්න වෙනවා.ඒ ගැන පෙර දැනුවත්වීමක් තිබීම වැදගත්. කොහොම වුනත් පොදු සංචාරක ගමනාන්ත සම්භන්ධයෙන් නම් එහෙම ගැටලුවක් නැහැ.ඒ වගේම යාපනයේ ගමනාගමනයට පොදු ප්‍රවාහන සේවා තියෙනවා. ඒත් කුලී රථයක් (cab) එකක් ගන්නවා නම් ගමන ගොඩක් පහසුයි කියන එකත් මතකයේ තියාගන්න.
3. ගාල්ල – බලකොටුවේ සිට ඉතිහාසයට
ගාල්ල කියන්නේ යුනෙස්කෝ ලෝක උරුම නගරයක්. ලන්දේසින් විසින් ඉදිකරන ලද ගාලු කොටුව තමයි ගාල්ලේ ප්‍රධානතම සංචාරක ආකර්ෂණය. ඒත් ගාල්ල කියන්නෙ සමස්ථයක් හැටියට ලෝකය පුරා සංචාරකයින් ආකර්ෂණය කරන සංචාරක පාරාදීසයක්.
ඇයි මෙතනට යන්න ඕනේ?
- ගාලු කොටුව, ගාල්ල ප්‍රදීපාගාරය, මුහුදු කෞතුකාගාරය වගේ ඓතිහාසික වශයෙන් වැදගත් ස්ථාන බලන්න යන්න පුළුවන්.
- උණවටුන, හික්කඩුව, මිරිස්ස වගේ ලස්සන වෙරළ තීරයන් වල නිදහසේ නාන්න පුළුවන්.
- රසවත් මුහුදු ආහාර රස විඳින්න පුළුවන්.
- ගාල්ල නගරයේ තියෙන පැරණි ගොඩනැගිලි අතර ඇවිදින්න පුළුවන්.
- බෝට්ටු සවාරියක් ගිහින් ගාලු වරායේ සුන්දරත්වය විඳින්න පුළුවන්.
ගාල්ලේ සංචාරය කරනවා නම් දැඩි හිරු එළියෙන් ආරක්ෂා වෙන්න වගබලාගන්න අමතක කරන්න එපා. හිස්වැසුමක් පැලඳීම, හිරු එලිය උරා නොගන්නා සුදු පැහැති ඇඳුම් ඇඳීම වගේම sun cream එකක් භාවිතා කරන එකත් අමතක කරන්න එපා. ඒ වගේම නිතරම ජලය පානය කරන්නත් අමතක කරන්න එපා.
4. ත්‍රිකුණාමලය – නැගෙනහිර ශ්‍රී ලංකාවේ සුන්දරත්වය
නැගෙනහිර වෙරළ තීරයේ ත්‍රිකුණාමලය කියන්නේ ලංකාවේ තියෙන ලස්සනම ස්වභාවික වරායන්ගෙන් එකක්. ඉතිහාසය පුරාම විවිධ ජාතීන්ගේ පාලනයට නතු වෙච්ච මේ නගරයේ සුන්දරත්වය ඇත්තටම වචනවලින් විස්තර කරන්න අමාරුයි.
ඇයි මෙතනට යන්න ඕනේ?
- ලෝක ප්‍රසිද්ධ කෝනේශ්වරම් කෝවිල, ෆෝට් ෆෙඩ්රික් කොටුව, නීලවෙලි වෙරළ, උප්පුවේලි වෙරළ වගේ ආකර්ෂණීය ස්ථාන බලන්න පුළුවන්.
- පරෙවි දූපතට ගිහින් පරෙවියන් දැක බලා ගන්න පුළුවන්.
- ස්නෝකෙලින් (Snorkeling) කරන්න, කිමිදෙන්න (Diving) වගේ විනෝද ක්‍රියාකාරකම් රාශියක නිරත වෙන්න පුළුවන්.
- මුහුදු මහා විහාරය වැනි පුරාණ ආගමික සිද්ධස්ථාන නැරඹිය හැකියි.
- ත්‍රිකුණාමලයේ අවට තියෙන කලපුවල බෝට්ටු සවාරි ගිහින් ඒවායේ සුන්දරත්වය විඳින්න පුළුවන්.
ත්‍රිකුණාමලය අවටස් සංචාරය කරනවා නම් නිසි ආරක්ෂාව යටතේ පමණක් මුහුදු ආශ්‍රිත විනෝද ක්‍රියාකාරකම් වල නිරත වෙන්න අමතක කරන්න එපා. මේක ඕනෙම වෙරළ ක්‍රීඩාවකට, ඕනෙම වෙරළ තීරයකට අදාලයි. අපි කලින් සඳහන් කල ගාල්ල සංචාරයටත් මේ කරුණ අදාල වෙනවා.
5. සිංහරාජ වැසි වනාන්තරය – ශ්‍රී ලංකාවේ ශාක සහ සත්ව විවිධත්වය අත්විඳින්න
ලෝක උරුමයක් වන සිංහරාජ වැසි වනාන්තරය ශ්‍රී ලංකාවේ නිරිත දිග තෙත් කලාපයේ තමයි පිහිටලා තියෙන්නෙ. ඇත්තෙන්ම එය කැලෑබද පෙදෙසක ඇවිදින්න ආස අයට කදිම තැනක්. ඊටත් වඩා ශ්‍රී ලංකාවේ ශාක සහ සත්ව විවිධත්වය අත්විදින්න හොඳම තැන තමයි සිංහරාජය.
ඇයි මෙතනට යන්න ඕනේ?
- දුර්ලභ ශාක හා සත්ත්ව විශේෂ රාශියක් දැක බලා ගන්න පුළුවන්.
- සොබාදහම සමඟ මුසුවීමෙන් මානසික සුවයක් ලබා ගන්න පුළුවන්.
- ඒ අවට ඇති දිය ඇලි, ගල් තලාවන් වගේ සුන්දර දර්ශන නරඹන්න පුළුවන්.
- ශාක සහ සත්ව ලෝකය ගැන අධ්‍යාපනික කරුණු රැසක් ලබාගන්න පුළුවන්.
සිංහරාජයේ ඇතුලට යන්න අවසර පත්‍රයක් අවශ්‍යයි. ඒ වගේම සිංහරාජයේ කැලෑබද පෙදෙස් වල ගමන් කිරීමේදී මග පෙන්වන්නෙකු සමඟ යාම ආරක්ෂිතයි. ඒ වගේම ඔබ එහි සංචාරය කරනවා නම් වනාන්තරය තුළ ජීවත් වන සතුන්ට හා ශාකවලට කිසිදු හානියක් නොකරන්න වගබලාගන්න ඕනෙ.
අවසාන වශයෙන්
මේ අගෝස්තු නිවාඩුවට ඔබ කැමතිම තැනක් තෝරගන්න. ඒත් ඒ ගැන කල්තියා සැලසුම් කරන්න අමතක කරන්න එපා. ඔබ සහ ඔබේ දරුවන් කැමතිම, ඒ වගේම වියදම දැරිය හැකි මට්ටමේ ගමනාන්තයක් තෝරගන්න අමතක කරන්න එපා. ඉතින්, මීලඟ අගෝස්තු නිවාඩුවේ ඔබ යන්න සැලසුම් කරන්නෙ කොහෙද?